TA'AZIYYAR SHEIKH LUHAYDAAN

Qasidah cikin tsarin : 

                ARAUSA

        •┈┈•┈┈•⊰✿🌺✿⊱•┈┈•┈┈•   

Mai taken :

    Ta'aziyyar Sheikh Luhaydaan

                            😭😭😭

(1) Mun zam cikin damuwa ƙwarai da  ahzaanu 

       akan rashin gwarzon malami Luhaydaanu

(2) Wannan da zargin mai zargi baya yin tasiri

       akansa balle baƙin hali na fattaanu

(3) Wajen nasiha yana yinta cikin hikima

       ya fayyace gaskiya tsantsa ga insaanu

(4) Gwani kafaffe akan bin magabata wajen

       riƙo ga Sunnah da bibiya ga Qur'anu

(5) Sam baya yarda da tsunbure cikin manhaji 

       koko kafar yaɗa ayyuka na shaiɗanu 

(6) Ya sami ƙauna da karɓuwa wajen talikai 

       ba ko kuɗi ba mulki irin na sulɗaanu 

(7) Saidai idan rabbi ya soka yakan sanya so 

       ya kewaye duk mutane da dukan jaanu 

(8) Ka duba ilminsa ya karaɗe duk duniya 

       tamkar ya Malik da Zuhriyyu da Sufyaanu

(9) Samun irin malami kamarsa sai an kula 

       an sa ma'aunin awo a wanga zamaanu 

(10) Gurbinka waƙe bazai toshe kafafensa ba

       koda yawan baitukan sun zarce diwaanu 

(11) Abinda zai kyautu gunmu addu'ace kawai 

       mukama roƙo da magiya ga Rahmaanu 

(12) Allah kayo gafara gareshi mai nunkuwa

       ka kankanre duk kurakurai da isyaanu

(13) Ka karɓi kyawawan ayyukansa sannan kasa 

       ya sami aljannah mai ƙamshi na rayhaanu 

(14) Anan nake miƙa ta'aziya ga dukkan musul-

       -man duniya har iyalansa da ikhwaanu 

 

    ✍🏻 

       Abul-Mustapha Al-athary

             ═══ ༻🕸️༺═══  

            3/6/1443 🔄 6/1/2 022

DOMIN SAMUN AUDIO 👇

                 https://t.me/alatharytv 

Sheikh Saleh Al-luhaydaan

                           ( Rahimahullah)